AEROPONIKA

AEROPONIKA, havoda oʻstirish (aero… va yun. ponos — ish) — oʻsimliklarni tuproqsiz, nam havoda oʻstirish. Oʻsimlik ildizlariga maxsus asboblar yordamida vaqt-vaqti bilan oziq moddalar purkab turiladi. Aeroponika usulini 1910-y. rus olimi V. M. Arsixovskiy tadqiqot maqsadlari uchun taklif qildi. Keyinchalik Aeroponikadan gulchilik va sabzavotchilikda ham foydalanila boshladi. Aeroponika usulida ildizmevali oʻsimliklar yetishtirish ham oʻzlashtirilgan. Issiqxona, oranjereya, kosmik kemalarda va b. da qoʻllaniladi.