BASTION

BASTION (frans. bastion — mustahkam qoʻrgʻon) — atrofi mustahkam devor bilan oʻralgan, beshburchak shaklida qurilgan harbiy istehkom. B. da zambaraklarni oʻrnatish uchun maxsus koʻtarmalar quriladi, mudofaa devori va xandaqning oldi, yon tomonini oʻqqa tutish uchun oʻt ochish nuqtalari oʻrnatiladi. Bastion birinchi marta Italiyada 15-a. da paydo boʻlgan. Bastion oʻz vaqtida zoʻr va ishonchli istehkom vazifasini oʻtagan. Bastion 19-a. oʻrtalarigacha qoʻllanilgan.