SARIBAND

SARIBAND (fors. — toʻgʻon boshi) — oʻrta asrlarga oid toʻgʻon (16-a.). Surxondaryo viloyatidagi Bandixon qishlogʻidan 7 km shim. sharqdagi Oʻrgʻulsoy oʻzaniga qurilgan. Uning pishiq gʻishtdan (25x25x5 sm) ishlangan ayrim qismlari saqlanib qolgan. Toʻgʻondan bir oz balandlikda Oʻrgʻulsoyning chap qirgʻogʻida Sariband nomli tepa bor; u baland hisor (30×30 m) va atrofi devor bilan oʻralmagan qishloq xarobasi boʻlib milodning boshlariga oid. Shu yerda daryo oʻzanidan qadimda turli taraflarga kanallar chiqarilgan. Kushonlar davrida xam bu yerda toʻgʻon boʻlganligi extimoddan xoli emas.