GEMATOLOGIYA VA QON QUYISH INSTITUTI

GEMATOLOGIYA VA QON QUYISH INSTITUTI, Oʻzbekiston Sogʻliqni saqlash vazirligi Gematologiya va qon quyish ilmiy tadqiqot instituti — i. t. muassasasi. Oʻrta Osiyo davlat un-ti tibbiyot f-ti jarrohlik klinikasidagi Qon quyish xonasi (1930) 1934-y. da Markaziy qon quyish st-yasiga aylantirildi. 1940 i. shu st-ya asosida Qon quyish in-ti tashkil etildi. 1959-y. dan hoz. nom bilan ataladi. In-tda kamqonliklar, leykozlar, gemoblastozlar, gemorragik diatezlar (gemofiliya, trombotsitopeniya)ning oldini olish va davolash, qon quyilgandan keyingi gepatit va shok holatlarini oʻrganish; ayollar va bolalar kamqonligini gemoglobinli tahlillash, koʻmik, qon va uning komponentlarini konservalash hamda transplantatsiya qilish, shuningdek donorlikning ayrim masalalari va h. k. ga oid tadqiqotlar olib boriladi. In-tda 295 oʻrinli 8 klinik boʻlim (kattalar va bolalar gematologiyasi, jarrohlik, kunduzgi boʻlim va b.), konsultativ poliklinika, 25 davolashdiagnostika lab. va boʻlimlar, qon quyish st-yasi, vivariy, kutubxona bor. In-t lab. da bir necha turdagi qon komponentlari va preparatlari tayyorlanadi. In-tda 5 fan dri va 15 dan ziyod fan nomzodlari, 30 ga yaqin malakali gematolog va transfuziologlar xizmat qiladi (2001). In-t OʻzRda gematologiya va qrn quyish muammolari boʻyicha ilmiy va uslubiy markaz hisoblanadi. In-t viloyat, shahar, tuman qon quyish st-yalari va Qizil Yarim Oy jamiyati bilan birga donorlikni rivojlantirish masalalari bilan shugʻullanadi. Ilmiy ishlar nashr etadi.