MYUSSE (Musset) Alfred de (1810.11.12 – Parij – 1857.2.5) – fransuz yozuvchisi. Fransiya akademiyasi aʼzosi (1852-y. dan). Ilk sheʼriy toʻplami «Ispan va italyan kissalari» (183O) da romantik maktab dasturi — adabiyotni hayotga yaqinlashtirish, yorqin manzara va syujetlar, kuchli ehtiroslar b-n yoʻgʻrilgan qaxramonlar obrazini yaratish oʻz ifodasini topgan. Sevgi va rashk, xiyonat va jazo bu toʻplamga kirgan dostonlar mundarijasini tashkil etadi. «Dudoq va jom» dramatik dostonida u ozodlikni kuylab, oʻzining diniy hurfikrliligini namoyish etgan. Myussening yolgʻizlik gʻam-alamlari aks etgan «Tunlar» turkum dostonlari (1835—37) jahon romantik lirikasining shoh namunalaridan hisoblanadi.
Myussening ilk pyesalari nasriy yoʻl bilan yozilgan («Venetsiya tuni», 1830; «Andrea del Sarto», 1833; «Ishq bilan hazillashib boʻlmaydi», 1834). Mashhur pyesalaridan biri «Lorensachcho» (1834)da muhim ijtimoiysiyosiy gʻoyalar olgʻa surilgan.
Myusse ijodining choʻqqisi «Asr farzandining tazarrusi» (1836) romanidir. Asarda Iyul inqilobidan keyin tarix sahnasiga kelgan yosh avlodning umumlashma obrazi tasvir etilgan. Ushbu roman jiddiy muammolarning koʻtarganligi va ruhiy tahlilning teranligi bilan Myussening boshqa asarlaridan keskin ajraladi.
Myusse ijodida Sharq sheʼriyati taʼsiri va Sharq xalqlari hayotidan olingan voqealar tasviri muhim oʻrin egallaydi.