Muhabbat baxt berishi kerak

Gyustav FLOBER hikmatlaridan

• Yozuvchining butun isteʼdodi oxir-oqibat soʻz tanlashi bilan oʻlchanadi.
• Dramatik sanʼat musiqaga oʻtgan geometriyadir.
• Ayollar erkaklarni buyuk ishlarga ilhomlantiradilar, biroq ularni amalga oshirgani vaqt qoldirmaydilar.
• Kitob – tirik jon. Begona qoʻl bilan qilingan har qanday jarrohlik amaliyoti, har qanday oʻzgarish uni mayibga aylantiradi. Balki u yaxshilanar, lekin baribir ilgarigi kitob boʻlmaydi!
• Agar reja juda uzoq vaqt va sinchiklab tuziladigan boʻlsa, u oxir-oqibat yoʻq boʻladi.
• Agar isteʼdodingni qadrlasang, ommani maftun etadigan vositalar ketidan chopmaysan.
• Umidsizlanganingda hamisha umid qilishing, umidlanganingda esa shubhalanishing kerak.
• Statistika – noaniq fanlarning eng anigʻidir.
• Anglash ishtiyoqti – yorugʻ qalblar uchun buyuk quvonchlar manbaidir.
• Vijdonni toza saqlash uchun uni boshqalarning vijdonidan baland tutish kerak.
• Xotirjam boʻlish – hazilakam gap emas, bu deyarli baxtli boʻlish demakdir.
• Afsuslanish yaxshi, lekin yomonlik qilmaslik undan-da yaxshi.
• Omadsizlikka uchragan yeringda bir ahmoqning muvaffaqiyat qozonayotganini koʻrishdan koʻra ogʻirroq kamsitish yoʻq.
• Hamma narsa eskiradi, hatto dard ham.
• Yolgʻizlikni xotiralar bilan toʻldirib boʻlmaydi, ular tanholikni chuqurlashtiradi, xolos.
• Muhabbat baxt berishi kerak. Baxt yoʻqmi, demak, adashibsan.
• Yaxshi yozilgan asar hech qachon zeriktirmaydi. Uslub – hayotning oʻzi, u fikrlarning yugurik qonidir.
• Mavzu tanlanmaydi. Shoh asarning siri shunda: mavzu – yozuvchining mijozi ifodasidir.
• Bahslashish tushunishdan koʻra osonroq.
• Yozuvchi salohiyatining bosh belgisi – nimani yozmaslikni bilishidir.
• Umidsizlik – kuchsizlik belgisi. Hafsalasizlarga ishonmang – ularning aksariyati zaif boʻladi.
• Yomon tushunadigan narsalarini koʻpincha umuman tushunmaydigan soʻzlari bilan tushuntirmoqchi boʻladilar.
• Noodatiy iztiroblar buyuk asarlarga asos boʻladi.
• Isteʼdodga ega boʻlish uchun unga egaligingga ishonishing kerak.
• Fikrning aniqligi ifodaning aniqligiga zamin yaratadi.

Rus tilidan Orif Tolib tarjimasi

“Yoshlik”, 2017–12