Post Views:
27
KAYKOVUS CHORBOFI – shayboniylardan Suyunchxo‘jaxon tomonidan Toshkentda bunyod etilgan chorbog‘ (1525). Toshkent hokimlarining qarorgohi hamda janglarda yarador bo‘lgan o‘zbek sultonlari davolanadigan shifoxona bo‘lgan. Hofiz Tanish Buxoriyning «Abdullanoma» asarida yozilishicha, Kaykovus chorbog‘i shahar qo‘rg‘oni tashqarisida, Kaykovus arig‘i bo‘yida joylashgan (nomi shundan) va unda Toshkent sultonlari yashagan. Abdullaxon II Toshkentni qamal qilganda (1579), Kaykovus chorbog‘ida bir necha kun qarorgoh qurib, dam olgan. Vosifiyning «Badoye ul-vaqoye» («Nodir voqyealar») asariga ko‘ra, Kaykovus chorbog‘ida shoirlar mushoirasi o‘tkazilgan, Navoiy va Jomiy she’rlari o‘qilgan, musiqachilar, xonandalar va boshqalar o‘z san’atlarini namoyish etishgan, bazm-ziyofatlar uyushtirilgan. Bu bog‘dagi hovuz va favvora atrofiga daraxt va gullarning turli-tuman navlari, manzarali daraxtlar ko‘plab ekilgan. Ayniqsa, Samarqanddan keltirilgan terak, qayrag‘och va boshqa daraxtlar mashhur bo‘lgan. Bizning kunlargacha Kaykovus chorbog‘idan xotira bo‘lib shaharning Sebzor dahasidagi ayrim mahallalar nomi (masalan, Xonchorbog‘ mahallasi) saqlanib qolgan.
«Toshkent» ensiklopediyasi. 2009 yil
https://shosh.uz/uz/kaykovus-chorbog-i/